Alam e Mubarak (Azadari)

Alam e Mubarak

Ye alam e mubarak jo hamari Qaum banati hai, ye sarkaar e wafa Hazrat Abul Fazlil Abbas ke alam ki shabih hai jo haqeeqat mein Janab e Rasool e Khuda sallallahu alaihi wa alehi wasallam ke us alam ki muqaddas shabih hai jis ke alamdaar janab e Haider e karrar (as) the.

Algharz! Ye alam Abbas bhi hai aur Alam e Hussain bhi, Alam e Hasan bhi hai, aur Alam e Ali bhi ye Alam e Ja’far e tayyar bhi hai aur Alam e Ahmad e mukhtaar bhi. Har daur me is Alam k alamdaar badalte rahe hai’n. Haqeeqat mein Alam Ek hi raha hai har Qaum ka Alam hota hai aur har jamaat ka(chahe wo mazhabi jama’at ho ya siyasi) jis se us ki pehchan wazeh hoti hai bilkul usi tarah
“Abbas ka Alam : Qaumi nishaan hamara ”
Jis se sarkaar e wafaa Abul fazlil Abbas aur unke alam ki yaad taaza karna aur is hasrat ki takmeel karna maqsood hoti hai ki agar ham maidane karbala me hote to ye alam zameen-bos na hota. Iska jawaz(jaez hona) kisi daleel ka mohtaaj nahi hai kyunki iske jawaaz me kisi mazhab wa maslak ke mazhabi qawaed ki roo se qat’an kisi Qism ka koi ishkaal nahi hai.

Ibadat aur deeni muamlaat ke alawa kisi bhi cheez ka jawaaz mohtaaj e daleel nahi hota, han albatta kisi cheez ki hurmat mohtaj e daleel hoti hai ya deegar ahkaam(wujoob, ehtiyaat, aur karahat) daleel wa burhaan k mohtaaj hote hai’n.

Irshad e Masoom (as) hai:
Har cheez jaez hai jab tak us ke mutalliq koi (sharai) mumane’at(mana hona) waarid na ho.

Beshak hamari Qaum chaahe to 100 100 feet nahi hazaar hazaar feet k oonche alam banaen taake :
Ooncha rahe apna alam… Badhte rahe yunhi qadam…. Hayya ala khairil amal
Aur mashriq wa maghrib tak iske pharaire lehraye aur agar koi nadaan aitraz karne wali zubaan aitraz kare to uske jawab mein
Gufta e ahqar Ek baar padh ke use suna ke yun

Magar is silsile me sirf ek baat qabile islah hai aur wo hai alam ko sajda karna.

Kitab: Islah ur rusoom asli Islam aur rasmi Islam
Musannif : Ayatullah Muhammad Hussain Najafi

Pesh kash : Aadil Abbas

As’haabe Hussain, Part 4

As’haabe Hussain, Part 4

BURAIR BIN KHUZAIR HAMDAANI

Janab Burair bin Khuzair hamdani Al-Mashriqi khandane hamdaan k qabile bani mashriq k ashraaf wa akabir me se hai’n. Hazrat Ameerul momineen aur Janab Hasnain alaihimussalam ke khaas as’haab me se the. Ulema ne inke halaat me likha hai ki “ye sin raseeda buzurg tabai buhat bade shujaa, ibadat guzaar, qaari e Qur’an(jin ko log Sayyid ul Qura kehte the) Ameerul momineen k sahabi aur qabila e hamdaan k ashraaf me se the” unhone “kitab alqazaya walahkam” k naam se ek kitab bhi likhi thi jis me Hazrat Ameerul momineen aur Janab Imam Hassan e Mujtaba alaihimussalam se riwayaat naql ki hai’n. Ye kitab usool e mo’tbara se samjhi jati hai.
Jab inko Hazrat Imam Hussain k madeene se Iraq ki taraf safar karne ki khabar mili to ye Buzurgwar ‘zakhirat ud darain, safha 260 aur farsan ul haija, jild 1, safha 40’ ke bayan k mutabiq banafse nafees makka pahunch kar aanjanab k sath ho gaye, aur dosre tareeq likhne walo k mutabiq raaste me kisi manzil par ja mile. Zahiri taur par yahi baat zyada sahi k qareeb lagta hai. Raaste me Sayyid us Shuhada k sath Hurr ki mulaqat k waqt Jab Imam ne dil bardashta ho kar khutba padha aur As’haabe Imam ne apni jaan sipari aur khidmat guzari ka izhar kiya to un mukhlis logo mein Janab Burair pesh pesh nazar aate hain. Isi tarah roze ashoora unke abdur rahman k sath mazaq karne aur unke tokne par unke jawab dene ki meri Qaum wa qabile ke log jante hai’n ki mai mazaq ka aadi nahi hun. Lekin aaj mustaqbil ki taabnaki wa darakhshandgi ke idhar ye log ham par talwaro se hamla karenge, udhar ham jannat ul firdaus me hoor ul ain ki refaqat me pahunch jaenge. Mujhe is mizaaj par amaada kar rahi hai. Is se unke darja e emaan wa eqaan aur jazba e shauqe shahadat par badi tez raushni padti hai. Ye unka shauq e shahadat hi tha ki jab pehle pehel fauje mukhalif se saalim wa yasaar maidane karzaar me aaye to idhar se fauran Janab Burair aur Janab Habib muqable k liye khade ho gaye magar Imam ne unko rok diya, jaisa ki pehle iska zikr kiya ja chuka hai.

Baharhaal jang e maghlooba k baad Janab Burair ye rajz padhte hue maidane kaarzaar me nikle

انا بریر و ابی خضیر
لیث یروع الاسد عند الزیر
یعرف فینا الخیر اھل الخیر
اضربکم ولا اری من ضیر
کذلک فعل الخیر من بریر
وکل خیر فلہ بریر
Iske baad tabad tod hamle shuru kiye, mukhalifeen ko qatl bhi karte jate the, aur sath sath ye bhi kehte jate the : “mere qareeb aao- ae momino ko qatl karne walo! Mere nazdeek aao! Aur ahle badr ki awlad ko qatl karne walo! Mere paas aao! Rasool e khuda ki awlaad wa zurriyat ko qatl karne walo! Inhi hamlo me alawa majrooheen k teen naariyo ko finnaar wa saqar kiya. Isi isna mein Fauje Yazeed se Yazeed bin Ma’qal nikla jo ke bani umairah bin rabia ka fard aur bani saleema bin abdulqais ka haleef tha. Idhar Hussaini jamaat se Janab Burair aage badhe, Yazeed ne kaha : Ae Burair! Khuda ne tumhare sath kaisa sulook kiya hai? Janab Burair ne jawab diya : “khuda ne mere sath buhat achcha sulook kiya hai, hala’nki tere sath bura sulook kiya hai.” Yazeed ne kaha : Tum jhoot kehte ho halan’ki tum is se pehle jhoot nahi bolte the! Phir kaha : Burair! Kya wo waqt bhi yaad hai ki jab ham tum bani lauzan k muhalle se guzar rahe the aur tum kehte the “ke Usman bin affan apne nafs par zulm karne wale(gunahgar) aur mawiya bin abi sufyan khud gumrah aur dosro ko gumrah karne wala tha. Aur Imam bar haq sirf Ali ibne Abi Talib hai’n. Janab Burair ne kaha : han mujhe achchi tarah se yaad hai aur ab bhai gawahi deta hun ki mera wahi pehle jaisa Aqeeda hai. Yazeed ne kaha : mai gawahi deta hun ki tum gumraho me se ho. Burair ne farmaya : agar khayal hai to aao mai is silsile me tumse mubahila karta hun. Aao dono bargahe qudrat me dua kare ki : wo, ham me se jo jhoota hai us par lanat kare aur sachche k hatho jhoote ko qatl kare, isliye dono ne hath buland karke dua ki, uske baad muqable k liye aage badhe. Yazeed bin Maqal ne Burair par waar kiya, talwar uchatti hui lagi aur Burair ko koi khaas chot na aayi, uske baad Janab e Burair ne ek aisa bharphoor waar kiya ke talwaar kaat’ti hui Yazeed k dimagh tak pahunch gayi, Yazeed fauran zameen par gir pada, is haalat me bhi Janab Burair ki talwar uske sar me gadi hui thi. Afeef bin Zuhair ka bayan hai ki goya mai dekh raha hun ki Burair uske sar se talwar ko harkat dekar kheench rahe hai’n. Is isna me razi bin manqaz abadi ne Janab Burair par hamla kar diya, dono sath gutham gutha ho gaye aur kuch dair tak kushti ladte rahe. Bilakhir Burair ne usko pachhadh diya aur uske seene pe charhh gaye, razi ne madad k liye apne sathiyo ko pukarte hue kaha “shamsheer zann difaa karne wale kaha hai’n? Isliye kaab bin Jabir bin amro izdi aage badha, Afeef bin Zuhair kehta hai maine kaab ko hamle se baaz rakhne k liye kaha. Kaab! Ye wahi Burair bin Khuzair hai jo Masjid e koofa me tumhe Qur’an padhte the. Magar usne koi tawajjoh na di aur naize se janab Burair par hamla karke naiza unki pusht me gaad diya. Janab Burair ne naize ki takleef mehsoos ki to razi bin manqaz ko khoob neeche raunda. Aur uski naak ka kinara kaat diya lekin naiza kyunki buhat zor se laga tha, Burair neeche gire phir kaab ne talwar ke kayi waar karke unko Shaheed kar diya. Afeef kehta hai goya ki mai ab aankho se dekh raha hun k ibne manqaz abdi jise Burair ne pachhadha tha is haal me utha ke kapdo se gard o ghubar jhaadh raha tha. Aur kaab izdi se keh raha tha : Ae izdi! Tumne mujh par wo ehsan kiya hai jise mai kabhi faramosh nahi kar sakunga. Jab kaab wapas palat kar koofa gaya to uski zauja ya behen Noora ne us se kaha : toone farzande Fatima k khilaf yoorish ki aur Sayyid ul Qura ko qatl karke Ek gunahe azeem ka irtekab kiya hai isliye mai tumse kabhi bat nahi karungi.

Kitab : Saadat ud darain fi Maqtal Al Husain
Ayatollah Muhammad Hussain Najafi
.
.
.
Mohtaj e dua Aadil Abbas

As’haabe Hussain, Part 3

As’haabe Husain, Part 3

Muslim bin Awsaja asadi

Janab ka naam Muslim bin awsaja bin sa’laba bin rudan bin asad bin khazeema al-asadi us saadi aur kunniyat abul hajl hai. Ye buzurgwar saaem-un-nahaar(din me roza rakhne wala) shab zindadaar(raat jaag kar ibadat karne wala) , qaari-e-quran, bade bahadur wa mard-e-maidan the. Aur Hazrat Ameerul momineen ke khaas as’haab me se the, unke hamraah teeno ladaiyo(jamal, siffeen, aur neherwaan) me shareek reh kar kirdaare shuja’at de chuke the. Ibne Saad ne tabqaat me inhe sahaba e Rasool(saw) me shumaar kiya hai. Aur shaa’bi ne inse riwayat hadees bhi ki hai. Aaqai maamqani ne apne rejaal me inke baare me likha hai. Inki jalalat-e-qadr, adalat, quwwate emaan aur shiddat-wara'(lehw o laab se sakhti se door rehne wala) wa taqwa tehreer wa taqreer me sama sakne se aage hai Ye wahi buzurgwar hai’n ke jab Shabe Ashoora, Sayyid us shuhada ne apne tareeqi khutbe mein apne as’haab ko chale jane ki ijazat de di thi to inhone arz kiya tha : “bhala ye mumkin hai ki ham aapko tanha chhorh kar chale jaen, agar aisa kare to qayamat k din baargahe ilahi me aapke jadde naamdaar ko kya jawab denge? Ba khuda agar mujhe yaqeen hota ke qaume jafakaar mujhe qatl karegi, phir zinda ho jaunga, phir mujhe qatl kar degi aur laash ko jalakar uski raakh hawa me udaa degi, isi tarah 70 baar bhi mujhse ye sulook kiya jaega, tab bhi aap ki taaeed wa nusrat se dastbardari ikhtiyar na karunga. Hala’nki mujhe yaqeen hai ki sirf ek baar hi Shaheed hona hai.

Is se pehle jab Hazrat Muslim koofa mein tashreef le gaye the to yahi Muslim unke bharose wale khaas fard the aur logo se unke liye bai’at lete the, baharhaal roze ashoora jab doosri baar jang maghlooba waqe hui(jiski taraf is se pehle ishara kiya gaya tha) aur amro bin alhajjaj ne sipahe hussain k maimana par aur Shimr bin zil-jawshan ne maisara par hamla kar diya aur is hamle ki wajah ye thi ki dast ba dast(aamne saamne, Ek bar Ek) ladai me dushman ka buhat nuqsan ho raha tha. Isliye amro bin alhajjaj ne apni fauj ko pukar kar kaha, Ae ahmaqo! Kuch Pata bhi hai ki kis se jang kar rahe ho? Ye khaas shahsawaar aur jaan par khelne wale log hai’n. Akela koi jang k liye na nikle, inki ta’daad hi kya hai, agar tum sab mil kar inko paththar bhi maaro to ye sab khatm ho sakte hain. Ibne Saad ne bhi is tajweez ko pasand kiya, aur Amro ne aage badh kar apni fauj ka hawsla buland karne k liye kaha “ae koofa walo! Apni ita’at wa jama’at ko laazmi pakde raho, aur jo deen se nikal gaye hain unke qatl k jawaaz me shakk na karo(maazallah). Imam Hussain ne jawab me farmaya : Ae amro bin alhajjaj! tu logo ko mere qatl par aamada karta hai. Kya tumhara khayal hai ki ham deen se khaarij ho gaye aur tum us par sabit qadam ho? Jab tumhari roohe qabz hongi aur maujooda kirdaar par tumhari maut waqe hogi to phir tumhe pata chalega ki deen se kaun khaarij hua hai aur aatishe jehennum me jalne ka sazawar kaun hai? “. Us waqt janab e Muslim Husaini lashkar k maisara me the jis ke salaar Zuhair bin Qain the. janab Muslim agar se sin-raseeda wa zaeef ul umr the magar quwwate emaani aur jazba e shahadat se sarshaar ho kar biphre hue shair ki tarah ghorhe ko airh lagakar ye rajz padhte hue maidane kaarzaar me aa gaye:
ان تسئلوا عنی فانی ذولبد
من فرع قوم ذری بنی اسد
Agar Tum mera naam wa nasab poochhte ho to mai shair beshai Shuja’at hun aur bani asad ke ashraaf se talluq rakhta hun
فمن بغانی حائد عن الرشد
وکافر بدین جبار الصمد
Jo ladne k liye mera talabgar hai wo tareeq rushd wa hidayat se bargashta hai aur jabbar wa samad k deen ka munkir hai.

Ye keh kar barqe-khatif(tez bijli) aur tez aandhi ki tarah sipahe-zalim par toot pade. Aur harb wa zarb ka tano garam kar diya. Jo saamne aaya kisi ko naize se aur kisi ko talwaar se waasile jehennum kiya. Isliye ibne saad ka ek lashkari muqable k liye nikla. Janab e Muslim ne uske dahine pehlu me naize ka ek aisa sakht waar kiya ke baaye’n pehlu se bahar nikal aaya aur wo wahi dhair ho gaya phir doosra nikla uska bhi yahi anjaam hua. Isi tarah kasht wa khoon karte hue 50 sawaro ko jehennum bheja.
Baharhaal ab As’haabe Hussain ne is dileri wa pamardi k sath mukhalif k hamle ka muqabla kiya ke dushman k daant khatte ho gaye aur use wapas hona pada magar is dauran me Janab e Muslim buri tarah zakhmi ho gaye the unko Shaheed karne me Muslim bin Abdullah Zabai wa abdur rehmaan bin abi khashkara aljabali sath sath the. In dono ko Janab e mukhtar ne waasile jehennum kiya tha..
Jab ghubare jang baitha to dekha gaya k Janab e Muslim bin awsaja khaak wa khoon me latpat pade hai’n. Janab e Sayyid us shuhada(as) aqaab ki tarah jhapat kar Muslim k baaleene sar tashreef le gaye. Us waqt Janab Habib bin mazahir bhi aapke sath the. Imam(as) ne dekha k abhi kuch jaan baaqi hai. Farmaya : Ae Muslim! Khuda tum par rehmat nazil kare. Phir ye aayat tilawat farmai : “faminhum man qadaa nahbahoo wa minhum mai yantaziru wa maa baddaloo tabdeelaa”
Momino mein (aisay) log bhi hain jinhon ney jo ehad Allah Taalaa say kiya tha unhen sacha ker dikhaya baaz ney to apna ehad poora ker diya aur baaz ( moqay kay) muntazir hain aur unhon ney koi tabdeeli nahi ki. (Surah Ahzab ayat 23)
Phir Janab Habib ne qareeb jakar kaha : Muslim! Tumhari maut mujh par shaaq hai tumhe jannat ki basharat ho.. Janab e Muslim ne kamzor awaaz k sath jawab me kaha : khuda tumhe bhi khair wa khoobi ki basharat de. Janab e Habib ne kaha : agar mujhe is baat ka yaqeen na hota ki mai bhi anqareeb aapke peechhe aaraha hun to zuroor tum se kehta ki jo wasiat karna hai karo. Janab e Muslim ne kaha : mai is buzurgwar k mutalliq wasiat karta hun ke in par apni jaan nisaar karna. Janab Habib ne kaha : Rabbe kaaba ki qasam! Mai zuroor aisa hi karunga. Isi isna me Janab e Muslim bina Awsaja ki rooh qafas e ansuri se parwaaz kar gayi. Inna lillahi wa Inna ilaihe rajeun

Janab e Muslim ki kaneez ne ye jaangdaaz manzar dekh kar nudba karte kehna shuru kiya : haaye! Mere sardaar! Kaneez ki awaaz sun kar amro bin alhajjaj ke sipahiyo ne masarrat wa shaadmani ke lehje mein kehna shuru kiya. Hamne Muslim ko qatl kar diya. Shabas ibne rab’ee ne kaha : tumhari maaen tumhare matam me baithe. Muslim bin awsaja jaise buzurgwar ke qatl par tum khushi ka izhaar karte ho? Maine islami jango me unke bade bade umdah kaarnaame dekhe hai’n. Fatah aazarbaijaan wale din maine unko dekha k musalmano ki saff bandi bhi mukammal nahi hui thi ki Muslim ne 6 mushrik qatl kar daale the.

Kitab : Saadat ud darain fi Maqtal Al Husain
Ayatollah Muhammad Hussain Najafi (hfz)
.

.
Mohtaj e dua Aadil Abbas

As’haabe Hussain, Part 2

As’haabe Hussain, Part 2

Hurr bin Yazeed riyahi

In ka khandaan khadeem ayyam se izzat wa azmat ka malik tha. Hurr k jadd aala ataab baadshah heera nomaan bin manzar ke makhsooseen me se tha. Khud janab e hurr ka shumaar koofa ke raosaa, wa sanadeed me hota tha aur sipah ibne zyaad mein ek dasta e fauj k afsar e aa’la the. Pehle pehel ibne zyaad ne inhi ko ek hazaar ki jameeat ke sath Imam Husain ka raasta rokne k liye bheja tha.(uske baad roze ashoora tak jo waqiaat saamne aaye wo ham kisi aur waqt share karenge, in sha allah).. Abdullah bin umair ki dilerana jang k nateeje me jab yasaar aur saalim qatl ho chuke to ehsase shikast ko kam karne aur maghloob gazab me aakar amro bin hajjaj zubaidi ne jo fauje Yazeed k maimana ka afsar tha. Apni poori taqat ke sath Husaini mujahideen ke maimana par hamla kar diya. Magar sipahe husaini ne is mauqe par sabr wa sibaat ka ajeeb muzahera kiya. Tareeq likhne walo ka bayan hai ki – unhone apne ghutne zameen par taik kar naizo ki aniya’n hamlawaro k saamne kar di. Iska nateeja ye nikla ki mukhalif ke ghorhe aage na badh sake. Aur jab mayoos ho kar wapas hone lage to As’haabe Hussain ne unko teero ki zadd par dekh kar teer maarne shuru kiye jis se mukhalif k kuch aadmi qatl hue aur kuch zakhmi.
(Aasir Bihaar, page 195|Nafsul Mahmoom, page 138| kaamil, volume 3, page 289)

Ye haalat dekh kar Hurr khidmat e Imam me hazir hue aur arz kiya “farzand e Rasool! Maine sabse pehle aap par khurooj kiya, ab mujhe ijazat de taaki sabse pehle aap par jaan qurban karu taaki is waseele se qayamat k din aap k jadd e naamdaar k sath musafeha kar saku. Sayyid Ajal ibne taaoos ne Janab e hurr k is bayan par tabsira karte hue likha hai
انما اراد اول قتیل من الان لان جماعۃ قتلوا قبلہےکما ورد
Lahoof, page 96
Yaani unki muraad ye thi ke (hamla e awla k baad) ab jo Shaheed hon un me se mai pehle darja e shahadat par faez hun. Kyunki un se qabl Ek jamaat jaame shahadat nosh kar chuki thi. Baharhaal janab e hurr ye rajz padhte hue maidane kaarzaar me nikal aaye –
انی انا الحر و ماوی الضیف
اضرب فی اعناقکم بالسیف
عن خیر من حلّ بارض الخیف
اضربکم ولا اری من حیف
Uske baad fauj e mukhalif par toot pade. Kuch tareeq likhne walo ka bayan hai k jab hurr lashkar ibne saad se alag hokar Husaini Jamaat me shaamil hue the to mukhalif fauj ke ek sipahi Yazeed bin sufyaan tameemi ne kaha tha: bakhuda agar mujhe is waqt hurr k jaane ka ilm hota to mai ek hi naize se uska kaam tamaam kar deta. Ab jab k janab e hurr tane-tanha nargha e aa’da me ghus kar shamsheer zani kar rahe the aur ye sha’ar bhi padhte jate the jo bilkul maujooda haalat ki tarjumani kar raha tha kyunki unka ghorha takwaar lagne se buri tarah zakhmi ho chuka tha –
ما زلت ارمیھم بشغرۃ نحرہ
ولباقہ حتی ترمل بلدم
Mai unko apne ghorhe ki gardan aur uske seene se barabar maarta raha, yaha tak ki ghorhe ne khoon ki chadar odh li.

Haseen bin tameem ne(jo ke ubaidullah bin zyaad ka police afsar tha) shakhs Yazeed bin tameemi se kaha: yahi Hurr hai jiske qatl ki tumhe tamanna thi. Ye sun kar Yazeed muqable ke liye nikla aur Hurr se daryaft kiya : kya muqabla karoge? Janab e Hurr ne kaha han. Uske baad Hurr ne us par ek aisa zabardast waar kiya ke Yazeed waasile jehennum ho gaya. Haseen bin tameem ka Qaul naql kiya jata hai k aisa ma’loom hota tha k Yazeed ki maut Hurr k hath me thi. Uske baad kyunki fauj e mukhalif se koi shakhs muqable k liye nahi nikla. Isliye Hurr wapas aa gaye. Agar se kayi chhoti maqtal ki kitabo me ye tafseel nahi lekin kutube mabsoota dekhne se ma’loom hota hai ki Janab e Hurr Namaz e zuhr k hungama e rastkhaiz k baad darja e rafiyya shahadat par faez hue. Isliye Janab Habib bin mazahir ki shahadat k baad janab Hurr jazba e shahadat se sarshaar hoke maidane kaarzaar me ye rajz padhte hue doosri baar nikle –
الیت لا اقتل حتی اقتلا
اضربھم بالسیف ضربا معضلا
لا ناقلا عنھم ولا معمللا
لاحاجزا عنھم ولا مبدلا
احمی الحسین الماجد المؤملا
Phir aa’da ki safon k bilmuqabil pahunch kar ye rajz padha –
انی انا الحر و نجل الحر
اشجع من ذی لبد ھزبر
ولست بالجبان عند الکر
لکننی الوتاف عند الفر

Janab e Zuhair bhi aap k sath shareek e jehaad ho gaye. Aur dono ne badh badh kar koofiyo ko waasile jehennum karna shuru kiya. Agar ek nargha e aa’da me ghir jata tha to doosra use chhurhata tha. Ayyoob ibne mashrah khaiwani ne Janab e hurr k ghorhe ki koonche kaat di. Ghorha girne laga to janab e hurr biphre hue sher ki tarah jast laga kar utar pade aur phir pyaada pa jang jang shuru ki. Isi isna mein Hurr ne kuch 40 se zyada jehennumiyo ko aur kuch k mutabiq 80 ko jehennum bheja.

Kuch waqt yahi kaifiyat jaari rahi. Magar thodhi dair k baad dushman ki pyaada fauj ne Janaab e Hurr ko is tarah se ghaire me le liya ke Zuhair ka difaa karna bhi bekaar sabit hua. Ayyoob ibne mashrah khaiwani aur shahsawarane koofa me se ek shakhs ne mil kar unhe Shaheed kar diya. As’haabe Husain (as) unki laash uthakar khidmat e Imam me laaye. Imam ne unko dekh kar farmaya : iska qatl ambiya aur awlade ambiya ki tarah hai.
Abhi unme kuch hayat baaqi thi. Aanjanab ne unke chehre se khoon saaf karte hue farmaya: waqian tum Hurr(azaad) ho. Jaisa ki tumhari maa ne tumhara naam rakha tha. tum dunya wa akhirat me bhi Hurr (azaad) ho. Uske baad Janaab e Sayyid us shuhada ne Hurr ka ye marsiya padha :
لنعم الحر حربنی ریاح
صبور عند مشتبک الرماح
ونعم الحر اذ نادی حسینا
وجاد بنفسہ عند الصباح

Kitab farsaan ul haija (page 127)aur nasiq tawareeq (jild 2, page 251) me neeche diye teen aur ash’aar bhi hai:

ونعم الحر فی رھج المنایا
اذا البطال تخفق بالصفاح
ونعم الحر اذ واسی حسینا
وفاز بالھدایۃ والفلاح
فیا رب اضفہ فی جنان
وزوجہ مع الحور الملاح
…………..
Kitab: Saa’dat ud darain fi Maqtal Al Hussain
Ayatollah Muhammad Hussain Najafi (hfz)
.
.
.
Tehreer Aadil Abbas

As’haabe Husain, Part 1

As’haab e Hussain, Part 1

Abdullah bin Umair kalbi

Naam Abdullah bin Umair bin Abbas bin Abd qais bin aleem bin janab Al kalbi Al aleemi hai aur kunniyat abu wahab hai. Janab Sheikh toosi ne fehrist me inhe janab e Ameer(as) ke as’haab mein se shumaar kiya hai. Koofa me muhalla bani hamdaan k nazdeek chah saad k paas ghar tha. Jis mein apni biwi umme wahab k sath(jo bani maz bin qasit se thi) rehte the. Usne Ek din maqaame naqeela k paas(jo ke koofa se bahar tha) logo ko jamaa hote dekha. Pata karne par ma’loom hua ki ye log Husain bin Fatima binte Rasool (sawa) k sath jang k liye bheje jarahe hai’n. Abdullah ne (dil mein) kaha : bakhuda mai husool e sawab wa sa’adat ki khaatir mushriko se jang karne ki badi chah rakhta tha. Mai samajhta hun Rasool ki beti ke farzand se jang karne walo k khilaf jang karne ka sawab kuffaar aur mushrikeen k sath jang jihaad karne se zyada hi hoga. Isliye Abdullah ghar pahuncha aur apni naik biwi se apne irade ka izhar kiya, usne iske irade ki taaeed karte hue use bhi sath le jane ko kaha. Isliye Abdullah use hamrah lekar aathvi Muharram ki shab ko Imam Husain as ki khidmat mein pahunch gaya. Roze ashoora tak khidmate Imam me raha. Roze ashoora jab pisare saad k teer maarne se jang ki shuruaat hui. Aur is pehle hamle mein kaafi ansaar e Husain maut se hamkinar bhi ho gaye to iske baad mubarezat talbi ka silsila shuru hua. Pehle pehel fauj mukhalif se do aadmi nikal kar mubarezat talab hue. Ek zyaad bin abeeh ka azaad kiya ghulam yasaar, doosra ubaidullah bin zyaad ka ghulaam saalim bin amro. Idhar husaini jamaat se janab Habib bin mazahir aur janab Burair bin khuzair uthe. Magar Imam Hussain ne unko rok diya. Itne mein janab Abdullah bin Umair kalbi ne izne jihaad talab kiya. Imam ne uske qad o qaamat par nigaah daali dekha ki gandum rang, lamba qad, taqatwar kalaiya aur chaurhe kaandho wala jawan hai. Phir farmaya : mera khayal hai ki ye muqabela me aane walo ko khoob qatl karega. Khulasa e kalaam ye ki Imam ne use izne jihaad de diya aur Abdullah maidan me nikle. Un dono ne Abdullah se naam wa nasab daryaft kiya. Abdullah ne apna hasab wa nasab bayan kiya. Unhone kaha : ham tumhe nahi pehchante. Hamare muqable mein Zuhair bin Qain ya Habib bin Mazahir ya Burair bina khuzair ko bhejo. Yasaar, saalim k aage tha. Janab Abdullah ne ye keh kar ki : Ae zane zaaniya ke bete! Tum mere muqable se peechhe hat rahe ho? Phir us par hamla kar diya. Aur talwar uske jism me ghop di. Wo use qatl karne me mashghool tha ki saalim ne us par hamla kar diya. Ashaab e husaini ne pukaar kar kaha : khayal karna ghulaam ne tum par hamla kar diya hai. Janab Abdullah ne uski koi parwah na ki. Jab Yasaar ko waasile jehennum kar diya to saalim ki taraf mutawajjo hua. Saalim ne talwar ka war kiya, Abdullah ne apne baaen hath par use roka, jis se uske hath ki ungliya kat gayi magar iske bawajood Abdullah ne jawab me aisa sakht waar kiya ki saalim jehennum raseed ho gaya. In dono ko jehennum bhejna k baad Abdullah ye rajz padhne laga :
—————————————————-
ان تنکرونی فانا ابن الکلبی
حسبی ببیعتی فی عُلیم حسبی
انی امرء ذر مرۃ وعصب
ولست بخوار عندالنکب
انی زعیم لک ام وھب
بالطعن فیھم مقدما والضرب
ضرب غلام مؤمن بارب
Agar Tum mujhe nahi pehchante, mai kalb ka farzand hun
Mere nisbat k liye kaafi hai ki mai ulaim se hun
Mai ek bahadur aur taqatwar mard hun
Aur peechhe nahi hat ta jab mushkilo se ghir jaun
Ae umm e wahab, mai yaqeen dilata hun
Ki aage badh kar, waar karta rahunga
Us bande ki tarah jo emaan me kamil ho
—————————————————
Ye rajz ye ashaar sun kar unki biwi umme wahab ne ek gurz hath me liya aur ye kehti hui ke “mere baap tum par qurban hon zurriyat e paighambar k liye khoob jang karo” apne shauhar ki taraf maidan e kaarzaar me badhi. Abdullah ne unhe wapas karna chaha. Magar usne Abdullah ka kapda pakad kar kaha ki mai us waqt tak tumse juda na hongi jab tak tumhare sath jaame shahadat na pee lun. Ye kaifiyat dekh kar Hazrat Imam Hussain ne buland awaaz farmaya “khuda tumhe jaza e khair de. Aurto ki taraf palat aao, khuda tum par rehem kare unke sath baith jao, kyunki aurto par jihaad nahi hai” hukm e Imam sun kar wo momina wapas laut aayi.

Udhar chunki fauj e mukhalif se phir koi mubariz na nikla. Isliye janab Abdullah bhi khidmat e Imam me wapas aa gaye. Iske baad janab Muslim bin awsaja maidan jang me gaye(jiski tafseel baad me ki jaegi) aur us waqt Shimr bin zil jaushan ne fauj k maisara se Husaini sipaah k maisara par hamla kiya. Aur ashaab e husaini ne badi paamardi se muqabela kiya. Us waqt us jang maghlooba mein Janab e Abdullah bin Umair ne phir khoob daade shuja’at di. Mukhalif ke aur do sipahiyo ko waasile jehennum kiya. Uske baad haani bin subait hazrami aur bukair ibne haiyy tameemi k hatho shahadat k darja e rafiya par faez hua. Jab uski biwi umme wahab ne ye manzar dekha to taabe zabt na rahi. Maidane kaarzaar mein pahunch kar apne azeez shauhar ke chehre se gard o ghubaar saaf karna shuru ki aur saath hi ye kehti jaati thi “tumhe jannat mubarak ho! Jis khuda e buzurg wa bartar ne tumhe shahadat ka darja ata farmaya hai us se dua karo ki mujhe bhi tumhare sath bula le. Shimr ne apne ghulaam rustam se kaha ki uske sar par gurz maar kar uska kaam tamaam kar do. Isliye us shaqi ne is mazlooma ko shahid kar diya. Is tarah us mohtaram khaatoon ka khoon e nahaq bhi tasveer e karbala me rang bharne k kaam aaya.

چہ خوش رسمے بنا کردند بخاک و خون غلطیدن
خدا رحمت کند ایں عاشقان پاک طینت را

i)Zakheerat ud darain, page 204
ii)Farsaan ul haija dar halaat e as’haab e Sayyid us Shuhada, page 253
iii)Kamil, jild 3, page 289
.
Kitab : Saadat ud darain fi Maqtal Al Husain
Ayatollah Muhammad Hussain Najafi (hifzullah)
.
Tehreer Aadil Abbas

توسل اور ہمارے عوام میں نئے کمزور توحیدی افراد کا دخل

توسل اور ہمارے عوام میں نئے کمزور توحیدی افراد کا دخل

مسئلہ یہ کہہ دینے سے کہ معصومین کی دعائیں ہیں انہوں نے کسی سے توسل نہیں کیا ہمیں ان کی ہی پیروی کرنی چاہیے، حل نہیں ہوتا. غور و فکر بھی کسی شئی کا نام ہے

پہلی بات معصوم خود وسیلہ ہیں اور قرب کی اعلی ترین منزل پر فائز ہیں انہیں کسی وسیلہ کی ضرورت نہیں پھر بھی معصومین اپنی اکثر دعاؤں میں توسل کرتے ہیں ایک دوسرے کے زریہ یعنی اپنے سے بزرگ ذوات پہ درود بھیج کر اور ان کا واسطہ دیکر جو کہ اہل بیت میں سے ہی ہیں، خود ہی سے ان دعاؤں کی طرف رجوع کر کے دیکھ لیں جو آیمہ نے تعلیم کہ ہیں.

اب اس حالت میں آئمہ کرام سے موازنہ کرنا نری جہالت ہے. جب قرب کے کامل ترین منازل پر فائز ذوات ایک دوسرے کو وسیلہ بناتی ہیں تو ہم کون ہیں جو وسیلہ پہ شک کر سکتے ہیں جو لوگو شک میں مبتلا ہیں انہیں کافی غور و فکر کرنا چاہیے، آئمہ کی دعائیں سرف ہمیں حاجات برآری کا ذریعہ نہیں بتا رہی بلکہ مکمل درس ہیں، لیکن سادہ لوح عوام علماء کرام کی تعلیمات سے دور رہ کر پتا نہیں کس جگہ سے بوسیدہ افکار حاصل کر رہے کہ اب انہیں توسل پہ شک ہونے لگا ہے، ان کے ذہنوں میں یا علی، یا محمد جیسے کلمات کہنے میں شرک نظر آتا ہے؟

حوش کے ساتھ کام لینے کی ضرورت ہے، علم کی ضرورت ہے، اور ہمیں عقائد سہی جگہ سے سمجھنے کی ضرورت ہے جو کہ ہمارے مراجعین کرام ہیں.

خدایا ہمیں توفیق دے کہ ہم علم حاصل کر سکیں اور اس پہ عمل کر سکیں..

नसीहते अली : हिस्सा 1

1: फ़ितना व फ़साद में इस तरह रहो जिस तरह ऊँट का वह बच्चा जिस ने अभी अपनी उम्र के दो साल ख़त्म किये हों कि ना तो उसकी पीठ पर सवारी की जा सकती है और ना उसके थनों से दूध दोहा जा सकता है।

अरबी :
قالَ علیہ السلام : کُن فی الفِتنَة کَابنِ اللَّبُونِ لَا ظَهرٌ فَیُرکَبَ، وَلَا ضَرعٌ نَیُحلَبَ

———————
नहजुल बलाग़ा
मुफ़ती जाफ़र हुसैन
———————

लबून दूध देने वाली ऊंटनी को और इब्ने लबून उसके दो साला बच्चे को कहते हैं और वह इस उम्र में ना सवारी को क़ाबिल होता है, और ना ही उसके थन होते हैं कि उनसे दूध दोहा जा सके। उसे इब्ने लबून इसलिए कहा जाता है कि इस दो साल के वक़्त में उसकी माँ आम तौर पर दूसरा बच्चा देकर दूध देने लगती है।

मक़सद यह है कि इंसान को फ़ितना व फ़साद के मौक़े पर इस तरह रहना चाहिए कि लोग उसे नाकारा समझ कर नज़र अन्दाज़ कर दें, और किसी गिरोह में उसकी शिरकत की ज़रूरत महसूस ना हो। क्योंकि फ़ितनों और हंगामों में अलग थलग रहना ही तबाह कारियों से बचा सकता है। हालांकि जहां हक़(सच) व बातिल(झूठ, ज़ुल्म) का टकराव हो वहाँ पर निष्पक्ष रहना सही नहीं और ना इसे फ़ितना व फ़साद की श्रेणी में रखा जा सकता है। बल्कि ऐसे मौक़े पर हक़(सच) की हिमायत और बातिल(झूठ, ज़ुल्म) को मिटाने के लिए खड़ा होना वाजिब(ज़रूरी) है जैसे जमल व सिफ़्फ़ीन की जंगों में हक़ का साथ देना ज़रूरी और बातिल से मुक़ाबला करना ज़रूरी था।
————————————————-

Fb Page : https://m.facebook.com/Farzandewilayat/